Kryeministri Edi Rama do të vijojë edhe këtë të shtunë mbledhjen me ministrat, kryesinë e PS-së dhe drejtuesit politikë të qarqeve, në orën 14:00, në Pallatin e Brigadave.
Në fokus të diskutimeve do të jetë sërish një analizë e punës së socialistëve, por edhe zgjedhjet e 11 majit. Çështja e votës së diasporës do të jetë një nga pikat kyçe të axhendës.
Po ashtu, pritet të diskutohet edhe për kristalizimin e skuadrës me kandidatë për deputetë në parlamentaret e 11 Majit, e cila do i nënshtrohet analizës së Kryesisë të PS-së.
Ndërkohë, kujtojmë se socialistët u mblodhën të premten për rreth 6 orë, ku u diskutua për programin elektoral si dhe për qasjen që socialistët do të ndjekin në takimet publike me qytetarët.












