Qeveria Rama njoftoi se do të shpallë një garë brenda këtij viti për ndërtimin e një aeroporti të ri në Gjirokastër. Vendimi vjen pas mungesës së interesimit të investitorëve për ndërtimin e një aeroporti që ishte përcaktuar të ndërtohej në Sarandë.
Drejtuesit vendorë dhe përfaqësuesit e bizneseve në Gjirokastër e kanë mirepritur vendimin si një hap pozitiv për realizimin e përpjekjes së tyre për ndërtimin e një aeroporti në këtë qytet. Kryetari i bashkisë së Gjirokastrës, Flamur Golemi thotë se ndërtimi aeroportit do të ndihmojë gjithë rajonin turistik.
“Është një lajm pozitiv dhe i dëshiruar jo thjesht për qytetin e Gjirokastrës dhe Qarkun e Gjirokastrës. Këtu po flasim për një ofertë të përbashkët turistike të Sarandës dhe Gjirokastrës. Me këtë numër të turistëve në rritje që ka pasur në 2023 dhe presim në 2024, aeroporti është një pikë e rëndësishme zhvillimi dhe do sjellë më shumë punësim dhe zhvillim ekonomik të kësaj zone“, tha Golemi.












