Apartamentet dhe bujtinat nuk mund të strehojnë turistë, nëse nuk regjistrohen si biznese. Me këtë “ligj”, qeveria synon të formalizojë sektorin e turizmit.
Qeveria Rama do të krijojë një regjistër të ri, pjesë e të cilit do të jenë dhomat e thjeshta private, apartamentet moderne, shtëpitë tradicionale, bujtinat e vilat që do përdoren në funksion të turizmit. Me ndryshimet ligjore, tashmë çdo sipërmarrës që zotëron një strukutrë akomoduese, duhet të regjistrohet në Qendrën Kombëtare të Biznesit dhe më pas të kërkojë certifikatë në ministrinë e Turizmit.
Pas këtij hapi, ai duhet të kryejë regjistrimin elektronik të klientëve me të dhënat mbi numrin e vizitorëve, netëve të qëndrimit, shtetësinë, rezidencën, gjininë dhe moshën.
Projektligji parashikon edhe gjoba, kur këto biznese nuk i përmbahen rregullave të reja, nga 200 mije deri në 400 mije lekë te vjetra.












