“Nga e hëna e ardhshme do të sekuestrohet çdo produkt bulmeti dhe qumësht që tregtohet pa faturë“. Këtë paralajmërim e dha kryeministri Edi Rama në fund të takimit me kryetarët e bashkive në funksion të vizionit “Shqipëria drejt anëtarësimit në Bashkimin Europian”.
Këtë vendim, Rama e arsyeton me anën ligjore por edhe shëndetësore. Sipas tij me këto temperatura mund të shkaktohen helmime.
“Dua të sjell në vëmendje faktin se drejtoria e përgjithshme e tatimeve është angazhuar për të sensibilizuar të gjithë ata që tregtojnë qumësht e bulmet pa faturë, që të mos e bëjnë më këtë gjë. Sepse duke filluar nga java e ardhshme do të konfiskohet çdo lloj shishe qumështi pa faturë dhe çdo lloj bulmeti pa faturë është e patolerueshëm nga pikëpamja e ligjit tatimor është dhe e shumë e rrezikshme në këtë fazë të vitit me këto temperatura që mund të shkaktojnë helmime që janë plotësisht të evitueshme. Duke filluar nga e hëna e ardhshme nuk ka më paralajmërime por vetëm sekuestrime të çdo lloj bulmeti e qumështi pa faturë”, tha Rama.












