Spartak Ngjela i ftuar në Report TV thotë se Sali Berisha dhe dhëndri i tij, Jamrbër Malltezi do të dënohen për aferën Partizani.
“Nuk e njihni Saliun. Politika e Saliut nuk e ka me opinionin publik. Ka krizë të brendshme dhe do të mbajë përkrahësit për ato arsye që ai rri në politikë. Të tjerat janë broçkulla. Është në proces penal, edhe sikur tre muaj të dënohet, Saliu ikën nga politika se nuk e lejon kushtetuta”, thotë Ngjela.
Ngjela thotë se Berisha e mban Ramën në pushtet, pasi nuk largohet nga politika. Sipas tij, Berisha e ka pushtuar Partinë Demokratike për interesin e tij personal.
“Saliu gënjen popullin. Sa të jetë Saliu nuk del në pushtet PD. E mban Berisha në pushtet Ramën, se nuk ikën. Ata (socialistët) janë me Saliun, se fitojnë sa herë të duan. Nuk janë me Saliun se e kanë aleat. Saliu ka pushtuar një parti, e ka zënë me interesin e tij personal që të shpëtojë veten o të shpëtojë pronën që e ka marrë me korrupsion ai dhe dhëndri i tij. Të dy në proces penal, nuk kanë shpëtim, edhe pronat do ua marrin edhe do dënohen. Kuptohet nga krimi për të cilën e kanë akuzuar”, tha Ngjela.
