Kryebashkiaku i Tiranës, Erion Veliaj ka reaguar pas vendimit të GJKKO për ta lënë në burg, duke e cilësuar procesin si të kurdisur dhe të mbushur me “lapsuse skandaloze”.
Veliaj denoncoi atë që e quajti një “gabim trashanik” në dosjen e tij hetimore, ku prokurori i çështjes, Ols Dado kishte shënuar se ai ishte i dënuar, sipas një dokumenti të Byrosë Kombëtare të Hetimeve. Veliaj theksoi se kjo është një shpifje, pasi dëshmia e tij e penalitetit është e pastër dhe se si kryebashkiak ka plotësuar të gjitha formularët e dekriminalizimit.
“Dje në sallën e gjyqit, vetëm pasi deklarova se jam i padënuar, prokurori Ols Dado u detyrua ta verifikonte me një telefonatë dhe e justifikoi si një ‘lapsus’. Po si mund të bëhet një lapsus i tillë në një dosje hetimore? Si mund të luhet me jetën e njerëzve duke e kaluar thjesht si një gabim shkrimi?”, u shpreh Veliaj.
Veliaj akuzoi Prokurorinë për një hetim të njëanshëm dhe tha se ky rast hedh dyshime serioze mbi gjithë procesin ndaj tij dhe bashkëshortes.
Veliaj premtoi se do të publikojë të gjitha “gabimet” e gjetura në dosjen hetimore, ndërsa akuzoi prokurorin Dado për tendencë të hapur për ta shpallur fajtor pa nisur ende gjykimi.
